اسبوع الموتى المؤمنين – قبل أحد مدخل الصوم الكبير.

المقدمـة :
المجد لله،
بأسبوع ذكرى الموتى المؤمنين احتفلت الكنيسة بعيد أبينا مارون مدرسة الزهد والتتّلمذ لكلمة الله وعيشها بجذرية، كمان بهالأسبوع صادف ذكرى سيدة لورد واليوم العالمي للمريض اللي برسالة البابا فرنسيس ركّز على حكمة القلب ... والليلة دعوة الرب لإلنا نكون على استعداد دايم لاستقبال الرب ولنستحق الجلوس معه على مايدته ...
وبفرح كتير كبير عيلة مار شربل بترحّب بكل الحاضرين وخصوصاً الموجودين معنا لأول مرة وسوا مع مار بولس منتذوّق مجد القيامة وقوتها بالذبيحة الإلهية
وللمشاركة بنوايا بعضنا البعض السلة على درج المذبح. ولنتقدم لسر التوبة الكهنة موجودين بكراسي الإعتراف ...
قدّاس مبارك ومقبول من الجميع.

نية الوطن والعالم مع نية الإنجيل
منصلي على نية المسؤولين بوطنا ولكل العالم لتكون مسؤوليتن خدمة وعطاء. يرحموا شعبن ويحافظوا على كرامتو يسندوا الضعيف والمحتاج لتعيش الإنسانية وتموت الأنانية.
بشفاعة إمنا مريم وبي عيلتنا مار شربل منسألك يا ربّ

نية الانجيل:
منصلي يا ربّ على نية مشروع حياتنا، قداستنا.
ساعدنا لنتحرر من ضعفنا وإهمالنا وما نتعلّق بكنوز هالدني الفانية. نسعى للكنز الحقيقي الأبدي يلّي هوّي إنت.
بشفاعة إمنا مريم وبي عيلتنا مار شربل منسألك يا ربّ

نية عيلة مار شربل والمكرسين
منرفعلك يا رب بأسبوع الموتى المؤمنين كل الرهبانيات ومنخص بالذكر الرهبانية اللبنانية المارونية وكل الجماعات المصلّية المسيحية ومنذكر منهم عيلتنا عيلة مار شربل احفظهم يا رب من التجربة وثبّتهم بعيش الجذرية رهبان في الأديرة ورهبان بقلب العالم.
بشفاعة العذراء مريم ومار شربل نسألك يا رب

السلّة
عامة:
على ابواب زمن الصوم المبارك، منسلمك يا ربّ استعدادنا لتحوله التزام وثبات وذهاب اكثر معك الى العمق.
منسلمك سلتنا اللى تقدمت على مذبحك، حاملة ومليانة خفايا قلوبنا، طلباتنا ونوايانا، ونحن اكيدين إنك رح تردها مليانة أجوبة ونِعمَ بتفوق توقعاتنا.
مع كل زوجين بعدن ناطرين نعمة طفل منصلي تتجاوب طلبتن.
مع كل بيت عم يبعاني نقص من الفرح مع مريم ناطرين ترد لبيوتنا فرح من عندك
مع كل شب وصبيبة التزموا بعهد وعم يستعدوا لقبول سر الزواج المقدس على مذبحك مع مريم منسألك تبني معهم.
مع كل شخص قدم نيته على مذبحك الليلة يا ربّ طالب رحمتك ونعمتك منصلي لتتمم مشيئتك
كل هالنوايا الي تقدمت وكل نية خفية ما انكتبت بل بعدها مطوية بقلوبنا منسلمك ياها ونحنَ منوثق بعنايتك.
بشفاعة العدراء مريم والقديس شربل منسألك يا ربّ.

مرضى:
الألم بهالعالم ما بينتهي، بس مع يسوع بيتحوّل. يا ربّ آلام البشر كثرت، امراض، اوجاع، نقص... بهالمساء المبارك منسلمك كل مرضانا، ونحنا اكيدين أنه امك العذراء سهرانة وحاضرة حدّن مثل ما كانت حاضرة بعرس قانا تنقلك حاجاتهم ونقصهم واوجاعهم.
مناخذ لحظات صمت منذكر فيها كل مرضانا.
تحنن يا ربّ علين واشفين وحول ألامن لخلاصن وخلاص كل شخص عم يعتني فين.
بشفاعة العدراء مريم والقديس شربل مسألك يا ربّ.

موتى:
بأسوع تذكار الموتى، منتذكر كل موتانا، كل اهلنا واحبائنا اللي فقدناهم بهالعالم وسبقونا للوقوف قدّامك، كل شخص علّمنا بهالمكان المقدس وسبقنا، كل شخص تعب وأفني حياته لخدمتنا، كل شخص تمّم مشواره وعبر، اجعل عبورن طريق سالكة إلى قبلك وملكوتك.
ومنقدملك يا ربّ كل نفس منقطعة ومناخذ لحظات صمت منذكر فيها موتانا.
اغفرلن يا رب وارحمن وببيتك اسكِنن، واعطينا نحن البعدنا احياء على هالأرض الوعي ما دام عنا وقت لنسفيد منه نتحضر ونعيش باستعداد للوقوف بدون خجل قدّامك.
بشفاعة العدراء مريم ومار شربل منسألك يا رب

شكران
يا بينا السماوي، يللي خلقتنا من نبع حبّك الفياض وغمرتنا بوفرة نعمك اللي ما بتنعدّ، من قلبنا الصغير وعيوننا الزايغة منشكرك
يا يسوع اللي تجسّدت عالمنا ولبست ضعفنا لتكون إلنا الحياة وبوفرة منشكرك. لأنو رحمتك ما بتوقف قدّام محدودية خدمتنا منشكرك. ولأنك بتغفر غلاظة سمعنا ووسخ شفافنا منشكرك
يا روح الله القدوس، إنت السهران عكل حواسنا وبتنهض فينا كل همة للخدمة لحتى نترجمها أعمال رحمة منشكرك
منشكرك أيها الثالوث القدوس عحضورك معنا ومرافقتك إلنا، ومنوعدك ونحنا عبواب الصوم إنو نقوّي الحراس عكل حواسنا لنوعي فينا أكتر الإحساس تجاه آلام وحاجات إخوتنا البشر لحتى، مع كل إخوتنا وكل اللي سبقونا نسبحك ونمجدك بالقيامة وباليوم الأخير ولأبد الآبدين، آمين

المسبحة أحد مدخل الصوم
مقدمة:
المجد لله. مسبحتنا الليلة تأمل بإنجيل أحد عرس قانا – مدخل الصوم الكبير. يوحنا  2 / 1-12

1-    "وفي اليَوْمِ الثَّالِث، كَانَ عُرْسٌ في قَانَا الجَلِيل، وكَانَتْ أُمُّ يَسُوعَ هُنَاك. ودُعِيَ أَيْضًا يَسُوعُ وتَلامِيذُهُ إِلى العُرْس.
يا ربّ يا مَن ظهر مجدك بالعماد، وبعدها حضرت مع مريم أمك للعرس، بحضورك باركت العرس، بحضورك قدّست السرّ، بحضورك وحضور أمكّ حلّت البركة على هالبيت والنعمة على هالحفل.
يا ربّ، بارك احتفالاتنا، تعا كون حاضر بمراسيم زواج كل شب وصبية، تعا مع أمكّ لأن حضورك بيقدس البيت، حضور بيقدس العرس، حضورك وحدك بيعطي استمرارية وثمار أبدية لكل احتفالاتنا.
على نية كلّ شب وصبية عم يتحضّروا لقبول سر الزواج المقدس، تعا يا رب مع مريم وما تسمح انّو نغيبكم عن احتفالاتنا. آمين.

2- ونَفَدَ الخَمْر، فَقَالَتْ لِيَسُوعَ أُمُّهُ: "لَيْسَ لَدَيْهِم خَمْر". فَقَالَ لَهَا يَسُوع: "مَا لِي ولَكِ، يَا امْرَأَة؟ لَمْ تَأْتِ سَاعَتِي بَعْد!".
ونفذ الخمر... ومين غيرك يا مريم سهرانة تا ما ينفذ الفرح. حضورك، حضور الأم المنتبهة على حاجات ولادها. تعي واسكني بيوتنا، اسهري على الفرح الذي نفذ لمّا غيّبنا الربّ عن حياتنا. ردّي ابنك على بيوتنا، وعي عيلنا على اهمية حضورك المدبر بحياتنا. إذا نفذ ا الخمر بتنتبهي قبلنا، وحزنّا وقلقنا ونقصنا وهمومنا لعند يسوع بتحملي، بدالة وثقة لأنه يسوع ما رح يرفضلك طلب، وكرامتك عنده ما بتنرد إلا نِعَم عزيرة لكلّ بيت بيدعيكي لعنده.
على نية عيلنا منصلي، على نية أنّه يرجع الفرح يملي بيوتنا، فرح الرب اللي ما حدا بيقدر ياخده منّا.

3 - فقَالَتْ أُمُّهُ لِلْخَدَم: "مَهْمَا يَقُلْ لَكُم فَافْعَلُوه!".
ورغم انك يا ربّ، جاوبت مريم بانه ما اجا الوقت بعد... لكن مريم عرفت انك رح تعمل شيء. سلّمتك النقص، نقلتك الحاجة، وهي مرتاحة مطمئنة انه قلبك الكبير ما رح يترك هالعبد الصغير يضيّع الفرحة.
ملّوا الجرار للآخر... تعبوا واجتهدوا والربّ بارك... يا ربّ، بارك تعبنا وجهادنا، بارك أعمالنا لتتطابق مع اقوالك، بارك صلاتنا لنفهم إرادتك، بارك إرادتنا لنعمل بمشيئتك.
على نية كل مرضانا تعا يا ربّ مع مريم السهرانة بارك وجعن وحوله لنعم تقدس نفوسن وحول النقص اللي فين لملء الشفا من عندك. بتضرع وشفاعة العدراء امنا آمين.

4- قَالَ لَهُم: "إِسْتَقُوا الآنَ، وقَدِّمُوا لِرَئِيسِ الوَلِيمَة". فَقَدَّمُوا.
يسوع الوديع المتواضع القلب، ما قدر يرفض طلب أمه، لم تأت ساعته بعد. وساعته هي ساعة الصليب، على الصليب رح يسكب خمرة حبه للآخر لأجلنا، على الصليب ومن جرج جنبه رح تخرج الخمرة الجديدة اللي بتعطينا الحياة الأبدية. استقوا الآن فرح آني، زمني، ولما تأتي الساعة سنستقي فرح أبدي لا يزول... يا رب منقدلك صومنا منقدملك هالزمن اللي داخلين عليه، قدس صومنا وصلاتنا، قوي جهادنا، وانصرنا على الخطية والضعف واعطينا نعبر معك ونشرب كاس خمرة حبك، اللي وحدها رح تعطينا الحياة. أمين.

5- تِلْكَ كَانَتْ أُولَى آيَاتِ يَسُوع، صَنَعَهَا في قَانَا الجَلِيل، فَأَظْهَرَ مَجْدَهُ، وآمَنَ بِهِ تَلامِيذُهُ.
بطلب من امك، حوّلت الماء لخمر، بطلب من أمك مليت فراغ العرس، بطلب من أمك اللي ما قبلت يغيب الفرح عن هالبيت، عملت لما يغيب الفرح عن البيب اللي اندعيت عليه انتَ ومريم. اظهرت مجدك، وأذهلت تلاميذك. أظهرت مجدك وادهشت الخدم اللي حولت تعبهم لخمر الفرح والحب. أمنوا وانطلقوا يرافقوك وكانت بداية الرسالة للبشرى السّارة.
يا ربّ تعا على بيوتنا، مجتعمنا، وطنا. مع مريم منصليلك، الفرح قلّ والحزن ملّا القلوب الضعيفة، اشفعيلنا يا عدرا عند ابنك، احملي همنا وتوبتنا، احملي انسحاق قلبنا ومن قلبنا احملي لبيوتنا النعمة، من قلبه احملي لقلوبنا النقاوة من قلبه احملي لقلوبنا القوة لنتوب كل يوم ونصوم ونصلي ليرجع الفرح الحقيقي يمليّ بيوتنا ووطنا آمين.