|
أبناء عيلة مار شربل يأتون من كل المناطق اللبنانية إلى عنايا كل ليلة جمعة... نقطع مسافات طويلة للتعليم والمشاركة وكسر الخبز والصلاة... كلنّا مدعوّين... قدّاسنا في عنايا مميّز بالمشاركة... من الصلاة التي تسبق التعليم ثم المقدمة إلى الشكران... ويلي القداس صلاة المسبحة التي ننشر ايضاً في هذا الباب تأملاتها... محتويات هذه الصفحة تُنشر باللغة العامية كما تتلى في عنايا دون أي تعديل.
تبدأ السنة الطقسية الجديدة 2007 - 2008 الأحد 4 تشرين الثاني 2007 بأحد تقديس البيعة.
السنة الطقسية مثل السنة المدنيّة تتألف من 52 اسبوعاً ومثلما تتكون السنة المدنية من دورة الأرض حول الشمس، كذلك تتكون السنة الطقسية من دورة الكنيسة حول المسيح. الكنيسة في دورتها حول المسيح ترافقه في تدبيره الخلاصي من ميلاده وعماده، صومه وآلامه إلى قيامته وصعوده وإرساله روحه القدوس على التلاميذ، حتى مجيئه الثاني، مستعدّة لذلك بالصلاة ومقتضيات الرجاء بتحقيق الملكوت. يعّلمنا المجمع الفاتيكاني الثاني، أنّ أمّنا الكنيسة المقدّسة ترى من واجبها أن تحتفل بالعمل الخلاصي الذي أتمّه عروسها الإلهي بما تحييه من ذكرى مقدّسة في أيّام معيّنة طوال السنة.
زمن القيامة المجيدة
المقدمة: " إن مشيئة الله إنما هي تقديسكم ... " ( أفس 4\3 ) إخوتي، حضورنا الليلة ما هو إلا تلبية لدعوة الرب لإلنا وبرهان لسعينا الدايم بطلب ملاقاة يسوع المسيح. وبهالزمن المبارك وبداية شهر مريم إم النّعم وتحضيراً لذكرى ولادة بيّ عيلتنا القديس شربل، منشارك بالصلاة بهالمكان المقدس حتى تتحقق مشيئة الرب فينا... بإسم رئيس وجمهور دير مار مارون وبإسم عيلة مار شربل منشكر الرب على كل الحاضرين وبالأخص المشاركين معنا لأول مرة بهالذبيحة الإلهية بيحتفل فيها الليلة ... وسوا منقدم نوايانا من خلال السلة على درج المذبح ومنتقدم بفعل توبة لكراسي الإعتراف لنقبل النعمة ونتحوّل لمشروع الله هدفه وغايته قداستنا ... منتابع القداس صفحة.. . قداس مبارك للجميع.
نية العالم
عالمنا عايش بظروف صعبة، اعطينا يا رب واعطي كل المسؤولين فيه لتتنوّر بصيرتهن ويوعو لمسؤولياتن بتحقيق مشيئتك ومشروعك تجاه الشعوب بإحلال السلام والمحبة وعيش رجاء جديد إن كان بلبنان أو بالعالم على ضوء نور ومجد وقيامة يسوع المسيح. بشفاعة إمنا مريم وبيّ عيلتنا القديس شربل منك يا رب منطلب.
نية الإنجيل.
مجتمعين الليلة يا رب لنرفعلك حاجاتنا، لنرفعلك ضعف إيماننا ونقص محبتنا لبعضنا البعض، لتحتى بقوة روحك القدوس تنمّي وتفيض علينا حبك الإلهي والحق لنتمكن نعيش رسالتنا رسالة الحب والسلام والتلاقي بين بعضنا البعض. بشفاعة إمنا مريم وبي عيلتنا القديس شربل منك يا رب منطلب.
نية عيلة مار شربل والمكرسين.
يا رب منصلي من أجل المرسلين والمرسلات في العالم ومن أجل الرهبانية اللبنانية المارونية السهراني على شعبك لخلاص النفوس. ومن أجل عيلة مار شربل حتى تبارك أعمالنا وتزيدنا نشاط بالعمل في حقلك الرسولي. يا رب ارسل لنا روحك القدوس حتى يشدد عزيمتنا على تتميم إرادتك ومشيئتك. بشفاعة إمنا مريم العذرا ومار شربل منك يا رب منطلب.
نية قداسة البابا بنديكتوس السادس عشر لشهر أيار 2008
كي يُعطي المسيحيّون أهميّة أكبر للعلوم الفنيّة والأدبيّة ولاستعمال وسائل الإعلام فيشجّعوا ثقافة الدفاع عن القيم الإنسانية وترقيتها. ولكي ترافق العذراء مريم نجمة البشارة وسيدة الرسل المرسلين في العالم كلّه بعاطفة الأمومة كما رافقت الرب في عهد الكنيسة
السلة
عامة. متل كل ليلة جمعة بزمن القيامة المجيدة وبشهر أيار المبارك يللي منكرّم فيه إمنا مريم العدرا وبذكرى زيارة قداسة البابا يوحنا بولس الثاني للبنان، جايين كلنا سوا لعندك يا رب برجاء تتجدّدنا وتذكّرنا لنعمل بكلام الإرشاد الرسولي، كلام الروح القدس لكنيستنا وشعب لبنان. ومع إقتراب عيد العيلة منسلّمك عيالنا يللي عم تعاني من تفكك أو هجرة أحد أفرادا، أو صعوبات مادية أو معنوية. ومنسألك تصون المؤسسة الكنسية الصغرى مدرسة الحب وترسلّها العون والسند. شبيبتنا اليوم تعبت وآمالها عم تُحبَط، رجّع الرجا لإلهن يا رب ونوّر عليهم ليكتشفوا دعوتهن ومكانتهم بالمجتمع. المسيح رجاؤنا، مع كل زوج وزوجة بإنتظار يفرحوا بمولود منصلّي مع ... مع كل يللي طلبوا صلاتنا في كل أنحاء العالم منصلي ومنذكر نية ... أيها المسيح رجاؤنا، نوايانا منسلّمك ياها حوّلها وجدّدنا وارسلنا شهود للرجاء والمحبة بقلب كل الصعاب. بشفاعة إمنا مريم العدرا والقديس شربل نسألك يا رب
مرضى: المسيح رجاؤنا بروحه نتجدد" مرضانا الكتار يا رب منقدّملك ياهن ومنذكر ... وكل الأسماء يللي بالسلة وبقلوبنا. بقلب الألم، قادر الإنسان يكون شاهد للرجا. إشفهم يا رب اذا أردت وقوّي كل مين عم يهتم فيُن لحتى معاً للمحبة يشهدوا. نسألك يا رب
موتى:
المسيح رجاؤنا: أتيت عـأرضنا يا رب تتخلّص جميع الناس. منسلمك كلي يللي سبقونا وكل الأنفس المنقطعة ومن موتانا منذكر .. أغفر لهم يا رب واسكنهم ملكوتك لينعموا بفرحك يللي ما بيزول. بشفاعة العدرا مريم ومار شربل منك يا رب منطلب.
الشكران
كل الشكر والتسبيح إلك يا بيّنا السماوي يللي عم تجمعنا بهالمسا المبارك حول مذبحك. منشكرك على الإرشاد الرسولي رجاء جديد للبنان يللي بيدعينا وبشدّد على صداقة الكتاب المقدس ومصداقية عيشو بوحدتنا بين بعضنا. الشكر إلك يا يسوع يللي بتجسّدك دلّيتنا عطريق الملكوت، كشفتلنا عن وجه الله المُحب، وبالإفخارستيا عم تشركنا بهالنعمة السماوية جسدك ودمك. منشكرك ع روحك القدوس الحاضر بوسط كنيستك هو يللي عم يثبّتنا فيك ويقدّسنا من خلال الأسرار تنكتشف إرادتك بحياتنا. منشكرك عوطننا لبنان وطن الرسالة وأهمية دوره الفاعل بمحيطو وبالعالم، هو منبع القديسين. مع مار شربل ورفقا ونعمةالله يللي كان إيمانهن إيمان بطرس، صَلب مبني علصخر وبقيوا ثابتين فيك بالرغم من كل العواصف ، منشكرك. منجدد وعدنا إلك يا رب أنو نحفظ وصاياك نعيش متطلبات الإنجيل ونلتزم بتعليم كنيستك، ومتل ما دعانا البابا يوحنا بولس التاني، يكون المسيح هو رجانا بروحو نتجدد معاً للمحبة نشهد من هلق وللأبد آمين.
المسبحة إرشاد رسولي إخوتي مسيرتنا الليلة هيي الأولى بهالسنة: منبدا فيها بذكرى ميلاد مار شربل ومساقبة السنة مع الذكرى السنوية للإرشاد الرسولي وزيارة قداسة البابا بأيار 1997. منشان هيك رح تكون تأملاتنا من وحي الإرشاد الرسولي وعبر المحطات التالية: المسيح رجاؤنا. بروحه نتجدد .معاً للمحبة نشهد. من أجل أن يبقى لبنان وطن الرسالة. بشفاعة القديسة مريم والدة الله والقديس شربل.
المحطة الأولى: المسيح رجاؤنا إخوتي بالظروف الصعبة يللي عم نعيشا خلينا نرجع نسمع نداء قداسة البابا بيقلّنا:"ان الرب يدعو كاثوليك هذه الأرض المقدسة الى ان يعيشوا في الرجاء الذي لا يخيّب صاحبة.. وأن يؤسسوا رجاءهم على المسيح. فهو راعيهم الصالح... وهو نورهم الحقيقي بشخصه وعمله وتعليمه... وهو قدرة الله فيما بينهم. نعم يا رب، من هلأرض المقدسة، ووسط كل شي عم نعيشوا منرجع نجدد ايمانا فيك ومنحط كل رجانا عليك حتى ما تدفعنا الصعوبات للهروب او التقوقع او الإنعزال او الذوبان بل العودة الى جذور ايمانا يللي منلاقي فيا منبع للقوة والثبات والثقة بالنفس والعمل حسب رضاك. منصلي اول بيت من المسبحة على نية زعزعة ظروف وطننا والصعوبات حتى يرجعوا يستمدوا قوتهن ورجائهن من المسيح آمين. أبانا...
المحطة الثانية: بروحه نتجدد إخوتي، كمان بالمحطة الثانية رح نصغي للكلام يللي عم يوجهلنا ياه قداسة البابا: "يطلب من الكاثوليك اللبنانيين ان يتوبوا ويبدلوا سيرتهم بدافع من الروح، وهكذا يظهر شيئاً فشيئاً، عالم جديد في هذه الأرض، بمعونة الروح القدس الذي ينفحنا بالحياة الجديدة الصادرة عن الله... وقد جاء السينودس بعنصرة جديدة، علينا ان نحمد الله عليها..." نعم يا رب، من هالعنصرة الجديدة ولدت عيلة مار شربل وكل التجدد يللي عم نعيشوا كبنيسة لبنان. منصليلك الليلة تتكمل هالعنصرة وعمل روحك القدوس علينا النابع من انجيلك ومثال القديسين وصلاتنا الفردية والجماعية. منصلي البيت الثاني من المسبحة على نية كنيسة لبنان حتى تبقى علّية لعنصرة دايمة. لآمين. أبانا ...
المحطة الثالثة: معاً للمحبة نشهد بالمحطة التالتة منصلي سوا مع قداسة البابا يللي بيقول: "أطلب من الرب... لكي تشهد الكنيسة في لبنان للمحبة التي توحد كل أعضائها على أنهم إخوة... إن أجمل قربان وأعظم ذبيحة يمكن تقديمها للرب هي سلامنا واتفاقنا الأخوي. .." نعم يا رب، إلك منرفع صلاتنا، انت المحبة الكاملة، لحتى تملينا من محبتك تنحب بعضنا متل ما انت حبيتنا. منصلي البيت التالت من المسبحة لحتى بالمحبة تتم الوحدة بقلوبنا وبعيالنا، وبمجتمعنا وبوطنا آمين. أبانا...
المحطة الرابعة: كي يبقى لبنان وطن الرسالة إخوتي، بالنسبة لقداسة البابا، لبنان هوي اكتر من وطن، هو رسالة. رسالة محبة، رسالة حرية، رسالة تلاقي وحوار حقيقي بيرتكز على الإحترام والعدالة والقيم الأخلاقية والسلام ... وبيعتبر انو اللبنانيين مدعوين بشجاعة الى مسامحة بعضن البعض وإخماد خلافاتهن وعداواتن وتبديل ذهنياتن... وبالنسبة الو المصالحة هيي نقطة إنطلاق الرجاء لمستقبل لبنان يللي رح يزهّّر من جديد ويلبي دعوتو تيكون نور لشعوب المنطقة وعلامة للسلام الآتي من الله. يا رب، رغم كل الغيوم يللي عم تغطي وطنا، رغم كل الشر يللي عم يتربص فيه، منوعدك انو نواظب على الإلتزام والعمل تيبقى وطنا رسالة بتشهد لحضورك الحي بهالشرق. منصلي البيت الرابع من المسبحة على نية وطنا لبنان لحتى يبقى وطن الإيمان والمحبة والحرية والسلام. أبانا ..
المحطة الخامسة: بشفاعة امنا مريم ومار شربل قداسة البابا يوحنا بولس الثاني ببداية حبريتو توجه للعدرا وقلّها:"كلّي لك". ونحنا اليوم بهالشهر المبارك منتوجه للعدرا ام الله وامنا وسيدة لبنان. ومنطلب شفاعتا لعيالنا ومجتمعنا وكنيستنا ووطنا. منطلب منا ترافقنا متل ما رافقت الرسل والكنيسة الأولى، ومتل ما رافقت شعبنا بتاريخو الطويل والصعب. الليلة كمان، بمناسبة عيد ميلادو ومن جوار المحبسة، منصلي لقديس لبنان مار شربل، تيتشفع فينا، وتيبقى لبنان وطن القداسة والقديسين. أبانا ...
|
