اسبوع القيامة – 2015

Our-Mass-Resurrection

النوايا :

1- نيّة العالم والوطن
بعالم مشحون بالعنف والموت وبتجذبنا فيه تيارات مغرية وخدّاعة، صار الانسان عم بفتش فيه على السلام الحقيقي، منلتمس منك يا رب نفس السلام اللي عطيتو لحاملات الطيب حتّى يبقى بقلب عيالنا يلي عايشين بخوف من المستقبل، ولحكّامنا والمسؤولين ببلادنا حتى تكون قيامتك لإلن قيامة من التساهل والأنانية قيامة للخدمة، ومنسألك انّو يكون أمانك وسلامك بالعالم كللّو انت للي جيت لتجعل من حضارات العالم حضارة محبّة ويكون سلامك بكل القلوب. بشفاعة امنا مريم وبي عيلتنا مار شربل منك يا ربّ منطلب.

2- الإنجيل:
ما بالكم مضطربين، أنا هو لا تخافوا.
بقيامتك يا رب فتحتلنا باب الحياة وحطّمت أبواب الجحيم وكسّرت قيود الظلمة، منطلب منك تفتح قلوبنا وعيّونا بقوة روحك القدّوس حتّى نفهم ونوعا لكلامك أكثر واعطينا نصير ابناء قيامة حقيقييّن، نمجدك بحياتنا ونسبّحك بايمانّا ونعلن بشهاداتنا انتصارك للعالم بكل ظرف ومكان ونعرف نستسلم لالك انت يلّي غلبت الموت.  بشفاعة امنا مريم وبيّ عيلتنا مار شربل منّك يا ربّ منطلب.

3- المكرسين وعيلة مار شربل
منصلي يا رب عن نية المكرسين والمكرسات وبالأخص منذكر الرهبنة اللبنانية المارونية تتضل خدمتن مليانة ثمار بنعمتك. منقدملك يا رب عيلة مار شربل تتزرع بقلب كل فرد من أفرادها السلام تيشع من نفوسن لكل العالم ويأدّوا رسالتن بخدمتك كرهبان بقلب العالم. بشفاعة مريم العذراء ومار شربل منك يا رب منطلب.

4- نيّة قداسة البابا فرنسيس لشهر نيسان 2015
نصلي مع قداسة البابا فرنسيس والكنيسة جمعاء من أجل النساء في الكنيسة لتكون مشاركتهُنَّ أكثر فعاليّةً ويُصبح دورهُنَّ في المجتمع  مشهوداً له.

5– سلّة النوايا:
بقيامتك يا رب خلصت كل البشر، وبانتصارك على الموت مليت السما فرح والأرض ابتهاج. منلتجي الك بهالزمن المبارك طالبين منك المغفرة للخاطيين الهداية للضالين – السلام بقلب المتعبين منصلي مع كل عيلة لتمتلي من سلامك.
يسوع القايم من الموت ماشي معنا عم يشاركنا همومنا وأتعابنا، وبقوي فينا الرجا والمحبة لما منشوفو بوجه كل انسان، ساعد يا رب كل ملتجي إلك ومهموم وتعبان.
يا رب بارك خطوة كل تنين عم يتحضروا لتأسيس عيلة تتكون عمثال عيلة الناصرة
ويا رب تعودنا على سخاءك وعطاياك انت العطاء المستمر، عيال كتيرة بترفعلك صلاتها الليلة طالبة منك نعمة طفل تملي بيتها فرح وشكر. بشفاعة امنا مريم ومار شربل منك يا رب منطلب.

مرضى:
يا يسوع انت اللي تحملت الألم وحولتو لسبيل خلاص ما تتخلى عن مرضانا فيض عليهم من نعمك وساعدهم عحمل صليب ألمهم بمحبة وصبر
منرفعلك كل مرضى الجماعة الحاضرة وكل الأسماء اللي بقيت بقلوبنا وبالسلة.
بشفاعة امنا مريم ومار شربل منك يا رب منطلب.

موتى:
فكما أن المسيح قام ويحيا على الدوام كذلك سنقوم كلنا في اليوم الأخير.
يا يسوع المنتصر عالموت ارحم موتانا خلي النور اللي شع من قبرك ينوّر عليهم ويكونوا معك بالفرح الأبدي وما منسى كلّ الأنفس المطهرية والمنقطعة. بشفاعة امنا مريم ومار شربل منك يا رب منطلب.

 

الشـكران: 
يا بيّنا السماوي منشكرك لأنك خلقتنا ودعيتنا للحياة الأبدية. منشكرك لأنك أردت الخلاص لكل واحد منا بعد ما دخلت الخطية والموت على حياتنا.
يا يسوع الحيّ، الحاضر معنا، انت يللي تممت مشيئة الآب، منشكرك على تجسدك وموتك وقيامتك من أجلنا. منشكرك لأنك عطيت معنى لكل ألم، جهد وصليب بحياتنا.
يا روح الله القدوس منشكرك على قوة القيامة يللي بتدخلها فينا وبتحط حياة بلك زاوية موت فينا وبتطلعنا أحرار بقلب العالم.
منوعدك يا رب نكون حقاً شهود لقيامة يسوع وين ما كنا بحياتنا، بالسلام والمحبة يللي منزرعهم بقلب العالم.
إلك المجد يا رب من هلق وللأبد. آمين

 

المسبحة
مسبحتنا الليلة 5 محطات، 5 تأملات حول انجيل الأحد القادم.

1-"في مساء ذلك اليوم يوم الأحد كان التلاميذ في دارٍ أغلقت أبوابها خوفاً من اليهود فجاء يسوع ووقف بينهم وقال لهم السلام عليكم.
بوسط قلقنا، خوفنا، مشاكلنا او هربنا، يسوع بيجي بيتخطى كلّ الأبواب المسكّرة وبيدخل على القلوب الموصدة ليعمل منّا أبناء قيامة.
"السلام عليكم". سلامه بيعطينا بيزرعه بقلوبنا بيدفعنا للخروج والسير مجدداً رغم كلّ مشاكلنا واحمالنا وبيقضي على خوفنا...
منقدم هالبيت من المسبحة على نية كل المرضى، مرضى النفس والجسد لحتى بوسط المهم بيدخل الرّب بأبواب قلوبهم وبيكسر كلّ خوف وبيحط رجا القيامة. آمين.

2- "قال ذلك واراهم يديه وجنبه ففرح التلاميذ لمشاهدتهم الرّب فقال لهم ثانية: السلام عليكم."
بمجرد انه الربّ بيدخل حياتنا. بمجرد انه نشاهد الربّ بقلوبنا. بيولد عنا فرح. سلامه بيعطينا فرحه بيزرعه فينا...
مع الرّب فيه فرح فيه سلام رغم كلّ الصعاب. علامات القيامة هي السلام والفرح.
يا ربّ ازرع بقلب كلّ واحد منّا علامات قيامتك.
منصلي هالبيت من المسبحة على نيّة الرهبانية اللبنانية المارونية تتضل منارة بهالشرق، تعطي قديسين عظام على مثال شربل ورفقا ونعمة الله... آمين.

3- "كما أرسلني الآب أرسلكم أنا أيضاً".
قال هذا ونفخ فيهم وقال لهم: "خذوا الروح القدس..."
كلّ واحد بينال الروح القدس هو خلق جديد... الروح بيعطينا اياه الرّب يسوع بيجدّدنا بيقوينا بيساعدنا وما بيعود يقدر يخدعنا سلطان هالعالم.
الربّ عم يرسلنا... خلينا اليوم نكون أبناء قيامة نروح نخبر عن حبّ الرّب...
ومع كلّ يوم جديد منسأل يا ربّ شو بتريد مني اليوم ارسلني... اعطينا نقدر نخفف من آلام هالعالم ونوَعّي بقلبهم الرجا...
منصلي هالبيت الثالث من المسبحة على نيّة عيلة مار شربل اعطينا نكون رسل حقيقيين وأبناء وشهود للقيامة نزرع الفرح والرجا محل تواجدنا وكلّ واحد محل ما ربنا عم يحطه فيه. آمين.

4- "من عفرتم لهم خطاياهم تغفر لهم ومن أمسكتم عليهم الغفران يمسك عليهم".
الرّب منح الرسل سلطان لمغفرة الخطايا... مثله هو...
ونحنا أبناء كنيسة. ويسوع بعده باقي بكنيسة وبهالعالم بيغفر الخطايا بواسطة الكاهن...
هو بيعطينا القوة للتغلّب على الخطيّة وإماتتها فينا هيك بيكون المسيح اللي انتصر بموته وقيامته عم ينتصر فينا نحنا كمان...
منقدم هالبيت من المسبحة على نيّة كلّ الكهنة والرهبان والراهبات وكلّ المكرسين... اعطيهم يا ربّ النعم ليقودوا النفوس الضايعة للخلاص. آمين.

5- على أن توما احد الاثني عشر ويقال له التوأم لم يكن معهم حين جاء يسوع فقال له سائر التلاميذ: رأينا الربّ. فقال لهم: اذا لم أبصر أثر المسامير في يديه وأضع أصبعي في مكان المسمارين ويدي في جنبه لن أؤمن...
توما بدو يشوف آثار المسامير ليصدق – المسيح انتقل للسما وحمل معه بفخر علامات الصلب علامات الآلام...
وتوما بدو يلمس ليصير شاهد على القيامة... وتوما كمان بدو الروح القدس... هو كمان بدو يصير ابن قيامة.
يا ريت رغبة توما بتنزرع بقلب كلّ واحد منّا.
لأن نحنا كمان اذا رغبنا انو نشوف الربّ رغبة حقيقية رح نشوفو ومش رح نلمس آثار المسامير لأن شوفته رح تلمسنا وتعبينا فرح وسلام وقوة من الروح القدس اللي بيغفر وبيشفي...
منصلي هالبيت من المسبحة على نية كلّ واحد منا عم بيشارك بهالمسيرة. عبينا يا ربّ من روحك القدوس وارسلنا لنكون شهود نزرع الفرح والسلام وين ما كان. آمين.