الأسبوع الأول من السنة الطقسية 2014- 2015 - اسبوع تقديس البيعة:

اسبوع تقديس البيعة

 

النوايا

 

العالم: جورج ع

منصلي يا ربّ على نيّة عالمنا على نيّة فاعلي السلام على نيّة المضطهدين على نيّة الباكين على نيّة المساكين بالروح الحزانى والجياع والعطاش إلى البر. على نيّة الودعاء وأنقياء القلوب بهالعالم وبوطنا لتزيدن نِعَم وتملي عالمنا من امثالن ليتقدسوا ويقدسوا عالمن. بشفاعة العذراء مريم ومار شربل وجميع القديسين منسألك يا رب.

 

الإنجيل : ريموند ن.

منقدملك يا رب بهالمسا المبارك بعيد جميع القديسين صلاتنا على نيّة كل شخص عاش قدّامنا القداسة بسيرة حياتو وتضحياتو، امّاتنا، بيّاتنا وأهلنا، معلمينا وكل عامل عِمل عمله بصمت ومشي قدّامنا بكل ثبات ومثابرة وكل شخص عم يتمّم رسالته بصدق وأمانة لحتى يا رب تكافؤن بنعم غزيرة بهالعالم وهداك العالم، عالم الحق. بشفاعة امنا مريم ومار شربل منسألك يا رب.

 

المكرسين وعيلة مار شربل: ريتا ع.

منرفعلك يا رب كل المكرسين والمكرسات خاصة الرهبنية اللبنانية المارونية، ساعدون تيعيشوا على مثال قديسينا بعمق وحبّ بلا حدود بلا شروط دون مقابل. ثبتون فيك ليعيشوا بطهارة وقداسة حتى يشعّ نورك من خلالن لكل البشر.

ومنصللي يا رب على نيّة عيلتنا عيلة مار شربل ملّينا من روحك القدوس حتى نحمل صليب جهادنا اليومي بمحبة فرح وتسليم بدون نق وتذمّر، تنتحوّل لشهود لإلك بكل العالم بشفاعة جميع القديسين. منسألك يا رب.

 

نية قداسة البابا:

نُصلي مع قداسة البابا والكنيسة جمعاء من أجل الذين يعانون من الوحدة كي يختبروا قُرب الله منهم ومؤازرة إخوتِهِم. ومن أجل الشبيبة والطلاب الإكليريكيين، والرهبان والراهبات، كي ينالوا تنشئةً رصينةً مليئةً حكمة.

 

نوايا السلة التي قدّمت على مذبح الربّ مع القرابين: رولانا ح.

 

العامّة:

رحلتك بهالعالم هي مشوار قداستك. منصلّي يا رب حتى نفهم هالحقيقة. نعرف انو مشوارنا بهالدني هو رحلة تقديس صوب الملكوت. علّمنا نصغي لصوتك نفهم ونتواضع حتى نقدر نحب لأنو بالمحبة منوصل للقداسة.
منرفعلك سلّتنا مع كل نوايا الجماعة الحاضرة اقبلن يا رب واعطي طالبينها النِعَم الكافية لقداستن.
منصلّي لكل شخصين قرّروا يقدسوا حبّن بنعَم سرّ الزواج بارك خطوتن وخلّي هالإتحاد يكون معك انت يا سرّ الحبّ
وللعيل اللي قسيت علين شرور هالعالم وفرّقت وحدتن منصلّيلك ترسل روحك القدوس يجمعن من جديد.
منطلب منك نعمة طفل لكل زوجين ناطرين يشاركوك نعمة الخلق علّمن ينطرو بصبر ورجا وثقة انو معك كل شي ممكن.
ولشبيبتنا اللي عم تترك وطنها وتهاجر ورا فرص العمل منصلّيلك ترافق غربتن وتحمي دروبن من مغريات العالم اللي بتشتتن عن قداستن.
بشفاعة امنا العذراء وبيّ عيلتنا مار شربل منسألك يا رب.

 

المرضى:

"تعالو اليّ أيها المتعبين والمثقلين وأنا اريحكم". منرفعلك يا رب كل المرضى المثقلين والمتعبين من شدّة مرضن، اشفيهن يا رب واعطين يحملو صليبن بصبر ورجا. منأخذ لحظات صمت منذكر فيها مرضانا.

بشفاعة جميع القديسين.

 

الموتى:

للموتى اللي سبقونا لعندك منصلّيلن يا رب حتى ترحمن وتسكنن ملكوتك مع القديسين حتى ينعموا بالحياة الأبدية. منأخذ لحظات صمت منذكر فيها موتانا.

بشفاعة امنا مريم ومار شربل منسألك يا رب.

 

الشكران: سوسن م.ع.

يا الله الآب منشكرك على قوة الحياة اللي بتحطا فينا نحنا ولادك لنناضل كل يوم برجاء.
يا يسوع منشكرك لأنو كل ما نطلب منك، فرصة جديدة بترجع تعطينا.
يا روح الرب منشكرك على قوة التجديد اللي بتملّينا منّا لنكون حاضرين دايماً لخدمتك وخدمة بعضنا البعض.
منوعدك أيها الثالوث نغيّر حياتنا، لنستحق نكون من اللي رح تقلّن طوبى لكم.
إلك المجد من هللأ وللأبد، آمين.

 

تأملات المسبحة: طوني ش.

المقدمة:  

المجد لله
بالأسبوع الأخير من زمن ارتفاع الصليب وبمناسبة جميع القديسين وتحضيراً لأحد تقديس البيعة، مسبحتنا الليلة مع امنا مريم لنتأمل بملكوت الله اللي تجلّى وصار بيناتنا وفينا ...

 

محطتنا الأولى : "مثلُ ملكوتِ السمواتِ كمثلِ رجلٍ زرعَ زرعاً طيباً في حقلهِ ..." (متى 13/24).

يا رب يسوع المسيح جعلتنا ابناء لملكوتك وزرعتنا بهالعالم زرع طيّب، وأمام إغراءات روح العالم أوقات منضعف ومسقط ومننجرّ لأعمال ما بتليق فيك نحن كأبناء ملكوتك.

اعطينا يا رب بشفاعة امنا مريم وكلّ القديسين نتسلّح بكلمتك المزروعة فينا بكل وقت حتى نقوى على كل قوى الشرّ ونبقى حجارة حية بملكوتك نبشّر ونشهد ونعيش إنجيلك إنجيل الحق والحياة.

منصلّي هالبيت مع امنا مريم من أجل عالمنا وبالأخص وطنّا لبنان لحتى بقوّة الروح القدس وكلمة يسوع يبقى بلد الرسالة والسلام ...

أبانا + السلام + المجد.

 

محطتنا الثانية : "مثلُ ملكوت السموات كمثل تاجرٍ كان يطلب اللؤلؤ الكريم، فوَجدَ لؤلؤة ثمينة، فمضى وباع جميع ما يملك واشتراها..." (متى 13 /45، 46).

هالتاجر سعى كل عمره ليحصل على الكنز وقت اللي لقاه تخلّى عن كل ممتلكاته واشتراه وجعله كل حياته الباقية، وللآسف يا ربّ نحن الكنز بقلبنا وعم نفتّش عليه بقلب ممتلكاتنا وخيرات هالعالم الزايلة.

اعطينا يا رب بهالمسا المبارك وعلى مثال قدّيسينا نعرف نتخلّى وندخل لأعماق قلوبنا حتى نلتقي فيك انتَ  اللي بتقول حيث يكون كنزكم يكون قلبكم ...

منصلّي هالبيت مع امنا مريم من أجل شبيبتنا الضايعة بوسط مجتمع استهلاكي لحتى بقوّة الروح القدس يعيدوا النظر بأولويات حاجاتهم ويوصلوا للكنز الحقيقي ملكوت الله يسوع المسيح...

أبانا + السلام + المجد.

 

محطتنا الثالثة : "مثلُ ملكوت السموات كمثل خميرة اخذتها امرأةٌ فجعلتها في ثلاثة مكاييل من الدقيق حتى اختمرت كلها ..." (متى 13 /23).

من قلب واقعنا لعم نعيشه من حروب وقتل واصوليات بتهدّد وجودنا وبتخلق فينا حالة خوف من الحاضر والمستقبل، مننسى دايماً يا رب نحن مين وليش انخلقنا بهالأرض بالذات، اكيد لتكون بالفعل هالخميرة اللي بتخمر وبطيب العجينة وكل اخوتنا حوالينا شو ما كانت الظروف، وتوضع نكهة يسوع المسيح الحب والخدمة والغفران والمسامحة بقلب هالعالم...

منصلّي هالبيت مع امنا مريم من اجل كل مسيحييّ الشرق وخصوصاً لبنان ومع كل الرهبانيات لتبقى نكهة وخميرة يسوع المسيح الطيبة بهالشرق...

أبانا + السلام + المجد.

 

محطتنا الرابعة: "مثلُ ملكوتِ السمواتِ كمثل شبكةٍ القيت في البحر فجمعت من كل جنس..." (متى 13 /47).

هالشبكة ما هي إلاّ كنيستك يا رب يلّي من على الصليب ومن العليّة اطلقتها ببحر العالم مع الرسل وبحضور امنا مريم لحمل البشارة لكل الأمم، زيدنا يا رب ايمان لنثبت نحن كمان بكرمتك وكنيستك ونكون الأغصان المثمرة نحمل البشرى السارة...

منصلّي هالبيت مع امنا مريم ام الكنيسة من أجل الكنيسة الجامعة المقدسة الرسولية لتفيض عليها يا رب روحك القدوس يجددها ويقدسها لتتقدّس من خلالها كل الشعوب ...

أبانا + السلام + المجد.

 

محطتنا الخامسة : "طوبى لفقراء الروح، للودعاء، للمحزونين، للجياع والعطاش الى البر، لاطهار القلوب للساعين الى السلام، للمضطهدين وأخيراً طوبى لكم... (متى 5/1).

طوبى لكل انسان التزم وكان أمين لكلمة الحياة ولإلهامات الروح القدس وعمل فيها وسعى وساهم ببناء هالملكوت الحاضر هلّق وعم يكتمل فينا يوم بعد يوم... اعطينا يا رب مع كل القديسين نعرف نتمثّل فيّن ونتخلّى على كل شي بهالدني ونطلب حبّ ملكوتك لينزاد لإلنا كلّ شي، ونكون علامة رجاء ومحبة...

منصلّي هالبيت مع امنا مريم وبشفاعة كل القديسين من أجل كل المشاركين معنا الليلة وخصوصاً عيلتنا عيلة مار شربل لحتى بقوة الروح القدس تجعل منّا يا رب أرض طيبة تقبل زرعك وتثمر اعمال محبة ومسامحة وغفران ...

أبانا + السلام + المجد.