الأسبوع الخامس زيارة العذراء لإليصابات - من السنة الطقسية 2014- 2015

Visitation

مقدمّة القداس:
المجد لله،
نحنا بأسبوع زيارة العذراء لإليصابات.
واحتفلنا من كم يوم بعيد القديسة بربارة اللى منصلّي معها تتزول الوثنية من عالمنا، وب5 كانون اول ذكرى إعلان القديس شربل طوباوي مسأله يصلّي دايماً لأجلنا.
منقدّم قدّاسنا على نيّة المرضى المتألمين نفساً وجسداً، ومنذكر زوّار هالدير وخاصة عيلة مار شربل الحاضرين والغايبين ومنرحّب بكل يللي عم يشاركونا لأول مرّة بالذبيحة الإلهية.
كل نوايانا يللي حاملينا بقلوبنا منوضعها بالسلّة على درج المذبح.
لتنقية قلوبنا، الكهنة موجودين بكراسي الإعتراف.
قدّاس مبارك ومقبول من الجميع.

النوايا:

نية الوطن والعالم:  ريتا ت.
منصلي يا رب على نية وطننا لبنان، وعلى نية كل المسؤولين بالوطن. ملّي يا رب بروحك القدوس قلوبهن بالمحبة تيعيشوها بكل أبعادها وينحنوا قدّام عظمتك ويكونوا أمينين على المسؤولية يللي بين إيديهم.
ومنصلي يا رب على نية عالمنا اليوم وبالأخص شبيبتنا يللي عم ينادوا بالحرية وعايشين بالعبودية. حطّ يا رب على طريقهن ناس يشهدوا لإسمك، ويوصلولهن محبتك تيتحرّروا من جنازيرهم.
بشفاعة مريم العدرا ومار شربل منك يا رب منطلب.

نية الإنجيل: ريتا ت.
"فجاءت وارتمت على قدميه".
منصلي يا رب على نية كل واحد منّا. اعطينا روحك القدوس تيخلق فينا إنسان جديد حرّ. علّمنا يا رب كيف نرتمي على إجريك كل مرة بيكون الوجع عم ياكل قلوبنا متل المرأة الوثنية، بإيمان كبير وثقة بمحبتك تنشوف من خلالهن الآخر وتكون نظرتنا نظرة محبة بتزرع فيه الحياة.
بشفاعة العدرا مريم ومار شربل منك يا رب منطلب.

المكرسين وعيلة مار شربل: كارين ي.ح.
منصليلك يا رب على نيّة كل المكرسين والمكرسات، خاصةً الرهبنة اللبنانية المارونية كرمال تثبتن بدعوتن وكرمال يؤدّوا رسالتن بكل جذرية وكل ثبات على رغم كل الصعوبات وكل التجارب يللي بتمرق علين كل يوم. من صلّي بالأخص على نيّة المخطوفين من مكرّسين وغيرهم، ومنطلب منك يا رب تفك أسرهم.
منصلّي على نيّة عيلتنا، عيلة مار شربل، لتضل قنديل مضوا بشعّ بنور الرب وسط كل هالظلمات، ومراية بتعكس وجه يسوع لكل الناس.
بشفاعة إمنا مريم العذراء، وبيّ عيلتنا مار شربل منسألك يا رب.

نية قداسة البابا: لشهر كانون الأول 2015
نُصلي مع قداسة البابا والكنيسة جمعاء كي يَحملَ ميلادُ الفادي السلامَ والرجاءَ لكلِّ صاحبِ إرادةٍ صالحة، وكي يحمِلَ الأهلُ رسالةَ الإنجيل بكلِّ صدق، ناقلين إلى أولادهم موهبةَ الإيمان الثمينة.

نوايا السلة التي قدّمت على مذبح الربّ مع القرابين:  باتريك أ.خ.
عامة: متل كل نهار جمعة منلتجي إلك يا بيّنا السماوي حاملين معنا سلّة نوايانا: نوايا قلوبنا ونوايا جماعتنا.
بزمن المجيء وبأسبوع زيارة إمنا مريم لإليصابات كلنا ناطرين زيارتك بقلوبنا، ببيوتنا، عيالنا ورعايانا. زور يا رب كل إنسان بحاجة إلك وكل يللي عم بفتّش عن حالو وعليك بقلب العالم.
زور كل عيلة عم تمرق بظروف صعبة وكل العيل المفكّكة وحطّ سلام فيها.
رافق يا رب كل شخصين عم يتحضّروا لسر الزواج ومتل ما فرّحت البشرية بولادة إبنك يسوع، فرّح قلب كل زوجين بعدهن ناطرين نعمة طفل.
كما منرفعلك يا رب كل يللي طلبوا صلاتنا من لبنان والعالم ويللي كلّهن رجا بإنك الإله الحقيقي والمحبّ.
بشفاعة إمنا مريم والقديس شربل منك يا رب نطلب.

المرضى: يا رب منرفعلك كل مرضانا، مرضى الجسد والنفس وخاصة الأسامي يللي بسلة النوايا.
منطلب منك تزورهن بحنانك ورجائك وتمنحهن الشفاء يللي هم بحاجة إلو. نحنا منآمن إنك قادر على كل شي. بشفاعة إمنا مريم والقديس شربل منك يا رب منطلب.

الموتى: يا رب، نحنا اختبرنا عظمة محبتك ورحمتك ومنآمن إنو إبنك تجسّد على أرضنا لحتى يمنح الخلاص لكل واحد منّا.
منرفعلك الليلة كمان أنفس كل موتانا وخاصة الأسامي يللي بسلّة النوايا والأنفس المطهرية والمنقطعة. ارحمهن يا رب واستقبلهن بأحضانك الأبوية. بشفاعة إمنا مريم ومار شربل منك يا رب منطلب.

الشكران: رولانا ح.
بهالزمن المجيد زمن هديتك الخلاصية إلنا يا بينا السماوي، ما فينا إلاّ ما نشكرك على هالعطية. منشكرك على الفرصة اللي اعطيتنا ياها تنتصالح من جديد مع ذواتنا. وندرك حقيقتنا بإبنك المتجسد حقيقة انتماءنا الأصلي لقلبك حقيقة أنو نكون ابناءك.
يا يسوع المتجسد منشكرك لأنك قبلت تكون الميلاد الجديد للإنسانية وتصير انسان طفل بمغارة وتعلمنا كيف نولد من جديد.
يا روح الله القدوس منشكرك على مرافقتنا بمشوار حياتنا تنحقق فينا الملكوت. منشكرك لأنك دايماً حريص تخلّينا عالدرب الصحيح بقوّة وثبات تنوصل للآب.
وعدنا إلك أيها الثالوث نحافظ على نعمة تجسد إبنك بحياتنا ونتجدد فيها لنرجع نخلق من جديد ونحقق الصورة اللي يتريدها فينا، نجاهد لنعيش إيماننا حتى نكون مثال بالبشارة والرسالة المليانة من انوارك.
إلك كل المجد من هلّق وإلى الأبد آمين.

تأملات المسبحة: هوغيت خ.
المسبحة: 
بهالزمن المبارك زمن التحضير لمجيء المخلص منتأمل بمسبحتنا الليلة بإنجيل زيارة مريم لإليصابات. مريم اللي غمرتها نعمة الله من وقت الحبل فيها الله باركها واختارها إم لإبنه وحفظها من كل وصمة خطية.

البيت الأول:
منتأمل بمعنى زيارة مريم لإليصابات اللي هي زيارة الله نفسه اللي فيها افتقد شعبه. مريم بعدما بشرها الملاك جبرائيل بالحبل الإلهي وخبرها أنو خالتها إليصابات حامل بشيخوختها راحت مسرعة لضيعة عين كارم تتخدم خالتها وتتقاسم معها فرح الإيمان بيسوع إبن الله المنتظر. بزيارتها مريم كانت أول رسولة، أول شاهدة وأول بيت قربان متنقل، بزيارتها نقلت الفرح وأعلنت إيمانها. وهون منسأل ذاتنا بزياراتنا عم نحمل معنا يسوع وننقله للآخر؟ عم نشهد لإيماننا ونتبع تعاليم معلمنا ونكون جاهزين تنلبي نداؤه؟ منقدم هالبيت الأول من المسبحة على نية وطنا لبنان اللي عم يمرق بظروف صعبة إنت يا ربّ زرت أرضنا وقدستها ما تسمح أنه يخرب هالوطن اللي هو رسالة للشرق.
مرة "أبانا الذي في السماوات" عشر مرات "السلام عليكِ"

البيت التاني:
منتأمل بلقاء العهدين يوحنا اللي هو خاتمة الأنبياء ويسوع اللي هو بداية العهد الجديد. بهاللقاء الروح القدس هو اللي عم يحكي فارتكض الجنين يوحنا فرحاً ببطن إمو. كلمة يوحنا معناها الله تحنن لأنو تجلت رحمته وحقق وعوده، كل العهد القديم كان تحضير لمجيء المخلص ويوحنا الله أرسله تيهييء الطريق ليسوع. هو صوت صارخ بالبرية عم يدعي للتوبة لأنه ملكوت الله قريب،هوِّ الصوت المنبّه اللي إجا ليشهد للنور.
متل ما تحرك الجنين بلقاءك حرّك عقولنا وضمايرنا تنكون فعَلة صالحين بحقلك ونكون شعلة  نور عم تضوّي بقلب ظلمة العالم. يكون عنّا تحدي نحكي بلغة يسوع ونواجه كل الصعوبات بجرأة وإيمان.
منقدم هالبيت التاني من المسبحة على نية أبناء عيلة مار شربل لأنه مش صدفة الله إختارنا نحنا مشروع الله عالأرض بدنا نكفي الرسالة ونكون شهود بالقول والعمل تنوصل للقداسة.
مرة "أبانا الذي في السماوات" عشر مرات "السلام عليكِ"

البيت التالت:
لوقا بيقلنا "فهتفت إليصابات بأعلى صوتها وقالت مباركة أنت في النساء ومباركة ثمرة بطنك، من أين لي ان تأتي إليّ أمّ ربّي".  بعد البشارتين الله صمت حكيت إليصابات بعدما ما امتلأت من الروح القدس، تنبأت أنه مريم هي مباركة بين جميع النساء لأنها آمنت أنه وعد الله تحقق وحشا مريم صار هو تابوت العهد لأنوالله اقام فيه. إليصابات هي الأولى اللي أعلنت مريم ذات طوبى بقولها طوبى للّتي آمنت بما قيل لها من عند الرب، آمنت أنه ما في شي مستحيل عند الرب. مع مريم وأليصابات اللي تجاوبوا لدعوة الله بحياتهم منصلي على نية كل المشاركين معنا حتى ربنا يملينا من أنوار روحه ونعرف نميز صوته من بين اصوات العالم  ونتمم مشيئته بحياتنا.
مرة "أبانا الذي في السماوات" عشر مرات "السلام عليكِ"

البيت الرابع:
تعظّم نفسي الربّ وتبتهج روحي بالله مخلصي. بالبيت الرابع منتأمل بنشيد مريم اللي هوِّ نشيد تسبيح وتمجيد لبيّنا السماوي لأنه تمّم وعده وأرسل إبنه مخلص وفادي. كان حشا مريم هوِّ الباب اللي من خلاله عبر الله من السما للأرض. بقولها تطوبني جميع الأجيال ما عم تنسب أي مجد إلها لأنو حصلت على أكبر نعمة لما الله اختارها تتكون إم لإبنه رح تطوبها الأجيال لأنها أم المخلص. بقولها رفع الوضعاء لما الله بيطَّلع من فوق علينا بتكون نظرته نظرة حبّ لأنه بدّو يرفعنا ويشركنا بعظمته. ساعدينا يا مريم تنعرف نعيش فضيلة التواضع وما ننبهر بالمراكز مهما عِلي شأننا ونوضع حالنا بين إيدين الرب البنّاء هوِّ وحده قادر يشيل الزايد منّا ويكمّل النقص اللّي فينا منقدم هالبيت الرابع من مسبحتنا على نية المسؤولين واصحاب السلطة تيعرفوا أنو كلّ سلطة هي مستمدّة من الله ويعرفوا يستعملوها لخير الإنسان والوطن.
مرة "أبانا الذي في السماوات" عشر مرات "السلام عليكِ"

البيت الخامس:
نحنا دايماً منطلب وما مننتبه نشكر الرب على عطاياه الكتيرة ونعمه الغزيرة هوّ اللي غامر كلّ إنسان بكرمه.
منقدم هالبيت الخامس صلاة شكر للربّ على كلّ النعم اللي فاضها علينا لمّا بعتلنا إبنه مخلّص وعلى النعم اللي بعده عم يفيضها علينا بمجانية.
منشكره على مريم اللي بعدها من السما عم تواصل دورها الأمومي تجاهنا
منشكره على روحه القدوس المرافقنا وعم يوعينا على دعوته إلنا
منشكره على قديسينا وبالأخص بي عيلتنا مار شربل اللي من خلال تدخله نشأت هالعيلة اللي هي مدرسة لكلَ واحد منا عم نتلمذ تننطلق للرسالة والشهادة
منقدم هالبيت الخامس من مسبحتنا على نية كل شخص طلب منا نذكره الليلة بصلاتنا حتى تكون إنت رجاؤهم الوحيد ويعرفوا أنو الخلاص من عندك. آمين.